Səudiyyə Ərəbistanında Məkkə istiqamətində PUA təhlükəsinin qarşısı alınıb

Səudiyyə Ərəbistanının rəhbərlik etdiyi koalisiya qüvvələri ölkənin Məkkə inzibati rayonu üzərində növbəti pilotsuz uçuş aparatının zərərsizləşdirildiyini bəyan ediblər.

AzadAzərbaycan xəbər verir ki, bu barədə koalisiyanın nümayəndəsi general-mayor Türki əl-Maliki sosial şəbəkə hesabında məlumat yayaraq hava hücumundan müdafiə sistemlərinin uğurlu əməliyyat həyata keçirdiyini bildirib.

Öz növbəsində, Yəmənin "Ənsar Allah" hərəkatının üzvləri – husilər müqəddəs şəhərə doğru hər hansı PUA buraxdıqları barədə yayılan xəbərlərin həqiqətə uyğun olmadığını vurğulayıblar.

Hərəkatın sözçüsü Yəhya Saria tərəfinin Səudiyyə Ərəbistanı ərazisinə zərbə endirmədiyini iddia edərək koalisiyanın açıqlamasını təkzib edib.

Xatırladaq ki, bundan əvvəl də koalisiya qüvvələri husiləri Məkkə və Mədinə şəhərlərini hədəf almaqda ittiham etmişdilər, lakin husilər bu cür iddiaları hər zaman qəti şəkildə rədd ediblər.