Somali sahillərində quldurlar 23 nəfərlik İran gəmisini qaçırıblar

AzadAzərbaycan xəbər verir ki, Somali quldurları "Azini" adlı İran balıqçı gəmisini ələ keçiriblər. Hadisə ölkənin şimal-şərq sahil xəttində, Bandar-Beyla və Hafun şəhərləri arasındakı akvatoriyada qeydə alınıb.

Puntlend muxtar regionunun dəniz polisindən verilən məlumata görə, ələ keçirilən gəmidə 21 nəfər İran vətəndaşı və iki somalili mühafizəçi olub. Hücumun arxasında 12 silahlı quldurun durduğu bildirilir. Hələlik ekipaj üzvlərinin taleyi və səhhəti barədə dəqiq informasiya mövcud deyil.

Beynəlxalq qurumlar isə baş verənlərlə bağlı ciddi xəbərdarlıq ediblər. MSCIO qeyd edib ki, ələ keçirilən gəmidən gələcəkdə ticarət gəmilərinə qarşı hücumlarda üzən baza qismində istifadə oluna bilər.

Avropa İttifaqının "Atalanta" hərbi-dəniz əməliyyatı insidentin bütün təfərrüatlarını araşdırmağa başlayıb. Qurumun rəhbərliyi həmin bölgədə hərəkət edən digər gəmiləri maksimum diqqətli olmağa və hər hansı şübhəli vəziyyətlə qarşılaşdıqda dərhal məlumat verməyə çağırıb.