Şuşa Şəhəri Günü: Tarixi Zəfərdən Böyük Qayıdış və Dirçəlişə

Prezident İlham Əliyevin 2023-cü il 31 iyul tarixli Sərəncamına əsasən, Şuşa şəhərinin işğaldan azad edildiyi 8 noyabr tarixi Şuşa Şəhəri Günü kimi təsbit edilib. 1752-ci ildə Pənahəli xan tərəfindən əsası qoyulan bu tarixi məkan Azərbaycanın və bütün Cənubi Qafqazın mədəni, ictimai-siyasi həyatında müstəsna rol oynayıb.

Şuşanın inkişafında müstəsna xidmətləri olan Ümummilli Lider Heydər Əliyevin təşəbbüsü ilə 1970-ci illərdə şəhərdə geniş quruculuq işləri aparılıb. 1992-ci il mayın 8-də işğala məruz qalan Şuşanın mədəni irsi erməni vandalizminə uğrasa da, 44 günlük Vətən müharibəsində rəşadətli ordumuz 2020-ci il noyabrın 8-də şəhəri azad edərək Zəfər tariximizi yazdı.

Bərpa mərhələsinə qədəm qoyan Şuşada Nazirlər Kabinetinin təsdiqlədiyi 2040-cı ilədək inkişaf üzrə Baş plan tətbiq olunur. Plan çərçivəsində şəhərin tarixi və coğrafi xüsusiyyətləri saxlanılmaqla mühəndis-kommunikasiya, nəqliyyat və sosial infrastruktur tam modernləşdirilir, piyada və velosiped yolları üstünlük təşkil edir.

Böyük Qayıdış proqramı çərçivəsində artıq Şuşada 450 mənzilli 23 bina sakinlərin istifadəsinə verilib, əlavə 10 yaşayış kompleksinin inşası sürətlə davam etdirilir. Bərpa edilən mədəniyyət abidələri ilə yanaşı, "Xarıbülbül" musiqi festivalı və Vaqif Poeziya Günləri kimi ənənəvi tədbirlər də yenidən şəhərə həyat nəfəsi gətirir.