İnformasiya Texnologiyaları İnstitutunda YAP ərazi təşkilatının iclası keçirilib

AzadAzərbaycan xəbər verir ki, Elm və Təhsil Nazirliyinin İnformasiya Texnologiyaları İnstitutunda Yeni Azərbaycan Partiyasının (YAP) müəssisə üzrə ərazi partiya təşkilatının iclası təşkil edilib. Tədbir Dövlət Himninin səsləndirilməsi, həmçinin Ulu Öndər Heydər Əliyevin və ölkəmizin ərazi bütövlüyü uğrunda canından keçən şəhidlərimizin xatirəsinin bir dəqiqəlik sükutla yad olunması ilə başlayıb.

İclasda çıxış edən AMEA-nın vitse-prezidenti, institutun baş direktoru akademik Rasim Əliquliyev YAP-ın VIII qurultayının dövlətin gələcək inkişaf xəttinin müəyyənləşməsində mühüm mərhələ olduğunu vurğulayıb. O, Prezident İlham Əliyevin irəli sürdüyü prioritetlərin elmi sahəyə də böyük məsuliyyət yüklədiyini bildirərək, institutda süni intellekt və kibertəhlükəsizlik sahələri üzrə yüksəkixtisaslı kadr hazırlığının diqqət mərkəzində saxlanıldığını diqqətə çatdırıb.

Tədbirdə YAP Yasamal rayon təşkilatının sədri, tarix üzrə fəlsəfə doktoru, dosent Bəxtiyar Nəbiyev də çıxış edərək respublikanın əldə etdiyi uğurların Heydər Əliyev kursunun uğurlu davamı olduğunu bildirib. O, texnoloji tərəqqi dövründə ideoloji təhlükəsizliyin qorunması, gənclərin vətənpərvərlik ruhunda tərbiyəsi və cəmiyyətdə maarifləndirmə prosesində alimlərin mühüm rol oynamalı olduğunu bildirib.

Daha sonra ərazi partiya təşkilatının sədri Gülnarə Nəbibəyova, Qadınlar Şurasının sədri Zərifə Cəbrayılova, Həmkarlar Komitəsinin rəhbəri Anar Səmidov və Gənc Alim və Mütəxəssislər Şurasının sədri Nərgiz Quliyeva çıxış edərək partiyanın dövlət quruculuğundakı xidmətlərindən danışıblar. Yığıncaq Yeni Azərbaycan Partiyasının himninin səsləndirilməsi ilə başa çatıb.